Xuraman Muradova - Əsl sevgi

Qəfil bir zamanda qarşına çıxar,
Ağlına gəlməyən o böyük sevda.
Baxışı od olar, qəlbini yaxar,
Həyatda yenidən başlanar sevda.

İstəmirəm sönük duyğunu, hissi,
Həyəcan verməyən eşq nəyə gərək?!
Boğar insanı o tənhalıq hissi,
Coşub-çağlamasa, vurmasa ürək.

İllər gəlib keçsin, qoy tək qalım mən,
Yalandan yaranan alova uymam.
Ruhum inciməsin peşmançılıqdan,
Mənasız sevgidən heç bir pay ummam.

Əsl sevgi odur – adı gələndə,
Gözündə bir ümid, bir işıq yana.
Üzün bircə anlıq, gizli güləndə,
Ruhun o sevginin eşqilə yana.