Xuraman Muradova - İnanma

Fani bu cahan, qoyma ürək qəmlə alışsın,
Dünyanın o sonsuz kədərinə dayan, inanma.
Hər anı yalandır, nə qədər bəzəsə varlıq,
Göz yaşları tökmə, desələr həyata inan, inanma.
Ölüm var ikən, sanki bir röyadır bu aləm,
Köç eyləyəcək hər gələn insan, oyan, inanma.
Boşdur bu savaş, bircə şirin candır əmanət,
Mənasız olan dərdə desələr sən yan, inanma.
Getdi neçə şahlar, bu saraylar sökülüb bax,
Məğrur durub, sanma, var əbədi dünyan inanma.